Giogos

"Tancas". Su giogu pro diventare su prus ricu de Sardigna

Su 28 de su mese coladu in Santu Lussurzu ant presentadu Tancas, unu giogu "de mesa" nàschidu dae s'idea de su gràficu lussurzesu Simone Riggio e produidu dae sa cooperativa sardu-genovesa Demoelà.
Est unu giogu chi assimìgiat a Monòpoli, ma in su tabellone (pintadu dae s'illustradore Dino Secchi) b'est rapresentada sa Sardigna cun biddas, nuraghes e crèsias antigas. S'iscopu de su giogu est a comporare tancas pro pòdere èssere su prus ricu de Sardigna, e difatis sas istrutziones comintzant cun Tancas serradas a muru / fatas a s'aferra-aferra...
In sos imprevistos chi faghent de disturbu, a unu li podent capitare sas cartas Amistade o Chentu concas chentu berritas, chi lu custringhent a cumbidare a totu sos giogadores in su tzilleri.
Su giogu at a èssere disponìbile dae sa metade de santugaine in sas butegas (costat 35 èuros). Chie cheret lu podet ordinare finas in Internet dae su situ www.demoela.com.
Pro nd'ischire de prus podides lèghere s'artìculu de La Nuova Sardegna.

 

 

Gherradores virtuales pro liberare sa Sardigna

Cherides proare a gherrare pro liberare sa Sardigna dae sos invasores romanos? Dae oe lu podides fàghere a manera virtuale, gioghende a su giogu "Gherradores" aparitzadu dae Domus de Janas cun su dinari de sa lege regionale 26/1997.
Su giogu est belligheddu a beru: in antis de incomintzare tocat a si seberare un'avatar de riferimentu intre Babbai (cun 4 ogros e 4 bratzos), Bàrdia (gherradora maghiàrgia) e Shardan (chi gherrat cun ispada e cun arcu).
A pustis de custu, s'incomintzat a gherrare a corfos de preguntas. Su giogu acabat cando si conchistat sa fortilesa romana (o cando sos invasores bos nch'isperdent sas trupas...).
Divertide·bos!
Bae a su giogu

 

 

Giogos in sardu pro pitzinnos

Sa Rete in custos ùrtimos tempos est boghende a campu giogos de ogni tipu e calidade pro imparare su sardu a sos pitzinnos minores.
De calicunu amus giai postu su cullegamentu in sa parte a manu destra de su blog (tocat a clicare in su link intituladu "Pro sos pitzinnos" o in sos link "Su padente de sa limba", "Gherradores" e "Si ses atzudu ajò").
Oe publicamus sos cullegamentos a àteros giogos belligheddos meda:
"Giogus de peràulas": dòighi giogos pro imparare a ascurtare, lèghere, iscrìere e cumprèndere su sardu (sa descritzione de sos giogos, però, est in italianu).
"Limba e contos de Sardigna": una manera interativa e simpàtica pro imparare sa fonètica, morfologia e sintassi de sa limba sarda, e in prus sa preistòria e s'istòria de sa Sardigna, terra "antiga finas pro sos antigos".
"Iscola Wiz": giogu a quiz totu in limba sarda subra de argumentos de cultura generale. Bellu meda.
Totu custos cullegamentos los agatades in sa parte intitulada "Pro sos pitzinnos" (a manu destra de su blog).




"Su gatu". Unu puzzle totu in sardu

Est nàschidu su primu giogu a incastros (puzzle) in sardu. L'at creadu Papiros pro lu dare comente donu a sos premiados de "Iscrie una lìtera a sos Tres Res" e como est disponìbile pro chie totu lu cheret comporare.
Custa bella idea est bènnida a Diegu Corràine, editore de Papiros impignadu dae annos meda in sa promotzione de su sardu. Nos ispiegat chi s'idea de fàghere giogos a incastru in sardu la teniat dae ora "ca creo chi tochet a s'ingeniare pro propònnere su sardu in manera moderna e chi agradet a sos pitzinnos".
E custu puzzle de su gatu ite tenet de particulare?
"Est unu giogu traditzionale de 100 incastros (adatu a pitzinnos minores)" ma sa novidade est chi "in sa figura sunt inditadas sas partes chi la cumponent: sa carena, sa conca, sos mustratzos, etc. E est in sardu finas sa cassita in ue est collidu du giogu!".
Sa figura est pintada dae Pia Valentinis, illustradora de fama chi onni annu faghet sas pinturas pro su prèmiu "Iscrie una lìtera a sos Tres Res".
S'idea de Corràine est de publicare finas giogos adatos a pitzinnos prus mannitos, cun sa punna de dare difusione a sa limba sarda in manera discansosa.
Su giogu costat 21 èuros e si podet ordinare online dae su situ de Papiros.



"Su padente de sa limba" - Giogu pro sos prus minoreddos

Pro sos pitzinnos prus minoreddos est disponìbile in Rete unu giogu chi lis imparat a contare, a memorizare sos nùmenes, a connòschere sos colores, sos animales, s'ortalìtzia e sa frùtora.
Custu giogu, nàschidu dae un'idea de Micheli Ladu, si narat "Su Padente de sa Limba" e apartenet a su progetu "Dischente" realizadu in su 2009 dae sa Provìntzia de Aristanis.
Gioghende in su "padente" (est a nàrrere in su buscu) sos pitzinnos ponent in movimentu sa mente cun giogos de memòria a tipu "Memory" o cun cullegamentos intre paràulas e immàgines.
Chie bi cheret giogare si podet cullegare a custu link.